ހުރިހާ ސްކޫލަކަށް އެހީތެރިކަން ފޯރުކޮށްދީގެން މިއަހަރުގެ ކުޑަކުދިންގެ ދުވަސް މުޅި ރާއްޖޭގައި ފާހަގަކުރުމަށް ނިންމައި، މާލޭގެ ފަސް ސަރަހައްދެއްގައި ޚާއްސަ ހަރަކާތްތަކެއް ކުރިއަށް ގެންދިއުމަށް ތައުލީމީ ވުޒާރާއިން ވަނީ ނިންމާފައެވެ.
ތައުލީމީ ވުޒާރާގެ ސްޓޭޓް މިނިސްޓަރ ޙުސައިން ސަޢީދު މުޙައްމަދު ވިދާޅުވި ގޮތުގައި، މިއީ ފުރަތަމަ ފަހަރަށް ޤައުމީ ފެންވަރުގައި ކުޑަކުދިންގެ ދުވަސް ފާހަގަކުރުމަށް އެ ވުޒާރާއިން އިސްނަގައިގެން ކުރާ މަސައްކަތެކެވެ. މީގެ ކުރިން ސްކޫލްތަކުގައި ކުޑަކުދިންގެ ދުވަސް ފާހަގަކުރަމުން އައީ ވަކިވަކި ސްކޫލުތަކުގެ ފެންވަރުގައެވެ.
“އަޅުގަނޑުމެންގެ މިނިސްޓަރު އިސްނަންގަވައިގެން ނިންމެވީ މާލެ ސަރަހައްދުގެ ސްކޫލުތައް އެކިއެކި ގްރޫޕްތަކަށް ބަހާލައިގެން އެކިއެކި ސަރަހައްދުތަކުގައި ކުޑަކުދީންގެ ދުވަސް ފާހަގަކުރުމަށް. ވަރަށް ގިނަގުނަ ހަރަކާތްތައް މީގަ އެބަ ހިމެނޭ،” ސްޓޭޓް މިނިސްޓަރ ވިދާޅުވިއެވެ.
މާލެ ސަރަހައްދުގައި ހަރަކާތްތައް ކުރިއަށް ގެންދާނީ ހުޅުމާލެ ސެންޓްރަލް ޕާކް، މުހިޔިއްދީން ސްކޫލް، ރަސްފަންނު، ހެންވޭރު ދަނޑު އަދި ޖުމްހޫރީ މައިދާން ސަރަހައްދުގައެވެ. މި ހަރަކާތްތަކުގައި ތަޢުލީމީ އަދި މުނިފޫހިފިލުވުމުގެ ޙަރަކާތްތަކުގެ އިތުރުން ދިވެހިވަންތަކަން ދައްކުވައިދޭ ޚާއްސަ ހަރަކާތްތަކެއް ހިމެނޭނެއެވެ.
ތަޢުލީމީ ވުޒާރާއިން ފާހަގަކުރެއްވި ގޮތުގައި، މި ހަރަކާތްތައް ކުރިއަށް ގެންދާނީ ކްލާސްރޫމްތަކުގައި ކިޔަވައިދޭ ގަޑިތައް ނުގެއްލޭ ގޮތަށެވެ. އަދި ހަރަކާތްތަކުގެ ތެރޭގައި ކުޑަކުދިންނަށް އެކުދިންގެ ޙައްޤުތަކާ ގުޅޭ މަޢުލޫމާތު ދިނުމާއި، އެކުދިންނާ މެދު ޤައުމުގެ ތަޞައްވަރު ކިޔައިދިނުން ހިމެނެއެވެ.