ރާއްޖެ ޑިޖިޓަލައިޒްކުރުމުގެ މަސައްކަތުގެ ފެށުމަކީ މޯލްޑިވްސް ޑިޖިޓަލް ޓްރާންސްފޯމޭޝަން ސަމިޓް ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. މިކަން އެމަނިކުފާނު ފާހަގަކުރެއްވީ “ރައްޔިތުންނާއެކު” ޕޮޑްކާސްޓުގެ ފަސްވަނަ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވި ގޮތުގައި ރައްޔިތުންނަށް ދެވޭ ޚިދުމަތްތައް އޮޓޮމޭޓުކޮށް ޑިޖިޓަލައިޒްކުރެވިއްޖެނަމަ، މަޤާމުގެ ނުފޫޒު ފޯރުވުމާއި ނާޖާއިޒު ފައިދާ ނެގުމުގެ ފުރުސަތު ހަނިވެ، ދެފުށް ފެންނަ މިންވަރު އިތުރުވެ، މަޢުލޫމާތު ހޯދުމަށް ފަސޭހަވެ، ކޮރަޕްޝަން ނައްތާލެވޭނެއެވެ.
އެމަނިކުފާނު ފާހަގަކުރެއްވި ގޮތުގައި މި ނިޒާމުގެ ތެރެއިން މުޅި ސަރުކާރާއި ދައުލަތުގެ އިތުރުން، ޕްރައިވެޓް ސެކްޓަރގެ މައިގަނޑު ޚިދުމަތްދޭ އިދާރާތައް އެއް ވިއުގައަކުން ގުޅާލެވޭނެއެވެ. މި މަޝްރޫޢުގެ ޤާނޫނީ އޮނިގަނޑުގެ ދެލިކޮޕީ އެކުލަވާލަމުންދާ ކަމަށްވެސް އެމަނިކުފާނު ވިދާޅުވިއެވެ.
ހަތަރު އަހަރުގެ މި މަޝްރޫޢުގައި ރާއްޖެ ޑިޖިޓަލައިޒްކުރުމުގެ މަސައްކަތް ކުރިއަށްދަނީ ޑިޖިޓަލައިޒޭޝަންގައި ކުރިއަރާފައިވާ އެސްޓޯނިއާއާ އެކުގައެވެ. “ދިވެހިރާއްޖެ 2.0” ގެ ތަސައްވުރު ޙަޤީޤަތަކަށް ހެދުމަށް ސަރުކާރުން މަސައްކަތްކުރަނީ އެސްޓޯނިއާއިން 25 އަހަރުން ކުރި ކަންތައް، ހަތަރު އަހަރުން ކުރެވޭތޯއެވެ.
ރައީސް މުޢިއްޒު އިތުރަށް ފާހަގަކުރެއްވި ގޮތުގައި 2030 ވަނަ އަހަރާ ހަމައަށް ދިވެހި ޤައުމީ އުފެއްދުންތެރިކަމުގެ 15 އިންސައްތައަކީ ޑިޖިޓަލް އިޤްތިޞާދަށް ބަރޯސާވާ މިންވަރަކަށް ހެދުމަކީ ސަރުކާރުގެ އަމާޒެކެވެ. އަދި މިފަދަ ބޮޑެތި ބަދަލުތައް ގެނައުމުގައި “ޗޭންޖް މެނޭޖްމަންޓް” ގެ މުހިންމުކަންވެސް އެމަނިކުފާނު ފާހަގަކުރެއްވިއެވެ.