މުލަކަތޮޅު މުލީގައި އަލަށް ތަރައްގީކޮށްފައިވާ އެއާޕޯޓް މިއަދު ވަނީ ކޮމާޝަލް އޮޕަރޭޝަންތަކަށް ހުޅުވާލައިފައެވެ.
ރީޖަނަލް އެއާޕޯޓްސްއިން މިކަން އިއުލާންކުރުމާއެކު، އެތެރޭގެ އުދުހުންތައް ކުރިއަށްގެންދާ މޯލްޑިވިއަން، ވިލާ އެއާ އަދި މަންތާ އެއާއަށް މި އެއާޕޯޓަށް އޮޕަރޭޓްކުރުމުގެ ފުރުސަތު ވަނީ ހުޅުވާލައިފައެވެ.
މި އެއާޕޯޓަކީ މުލަކަތޮޅުގައި ތަރައްގީކުރެވުނު ފުރަތަމަ އެއާޕޯޓެވެ. 1200 މީޓަރު ދިގު އަދި 30 މީޓަރު ފުޅާ ރަންވޭއަކާއެކު ތަރައްގީކޮށްފައިވާ މި އެއާޕޯޓުގެ މަޝްރޫއަށް ސަރުކާރުން ވަނީ 221 މިލިއަން ރުފިޔާ ހޭދަކޮށްފައެވެ.
މުލީ އެއާޕޯޓުގެ މަޝްރޫއުގެ އަމަލީ މަސައްކަތް ފެށިފައިވަނީ 2021 ވަނަ އަހަރުގެ އޮގަސްޓް މަހުއެވެ. އަދި 2023 ވަނަ އަހަރުގެ މެދުތެރޭގައި ޚިދުމަތްދޭން ރޭވިފައި އޮތް ނަމަވެސް، އެކި ސަބަބުތަކާ ހުރެ މަޝްރޫއުގެ މަސައްކަތްތައް ވަނީ ލަސްވެފައެވެ.
މި އެއާޕޯޓުގެ ޓެސްޓް ފްލައިޓް ޖައްސާފައިވަނީ މިދިޔަ މަހުގެ 25 ވަނަ ދުވަހުއެވެ. ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ފެށުނު މި މަޝްރޫއު ނިންމައި، އެއާޕޯޓް ހުޅުވުމަށް ސަރުކާރުން ކުރިން ކަނޑައަޅާފައިވަނީ މިދިޔަ މަހުގެ 31 ވަނަ ދުވަހު ނުވަތަ މި މަހުގެ ފުރަތަމަ ދުވަހުއެވެ. ނަމަވެސް އެކަން ވަނީ މުއްދަތެއް ނެތް ގޮތަށް ފަސްކުރެވިފައެވެ.