އެލައިޑް އިންޝުއަރަންސްގެ އިޖްތިމާޢީ ޒިންމާ “ޕްރިމިއަމް ފޯ ގުޑް”ގެ ދަށުން ތަޢާރަފްކޮށްފައިވާ ކޮމިއުނިޓީ ފަންޑް އަދި އެޑިއުކޭޝަން ފަންޑަށް ކުރިމަތިލުމުގެ ފުރުސަތު ހުޅުވާލައިފިއެވެ.
މި ފުރުސަތު ހުޅުވާލާފައިވާކަން ހާމަކޮށްފައިވަނީ އެލައިޑުން ބޭއްވި ނޫސްވެރިންގެ ބައްދަލުވުމެއްގައެވެ.
އެލައިޑް ކޮމިއުނިޓީ ފަންޑަކީ 6 ދާއިރާއެއް ހިމެނޭގޮތަށް މުޖުތަމަޢަށް މަންފާ ކުރުވަނިވި ޚިޔާލުތައް ހަގީގަތަކަށް ހެދުމުގެ ބާރުވެރިކަން އަތޮޅު ތެރޭގައި ހަރަކާތްތެރިވާ ޖަމްޢިއްޔާތަކަށް ލިބިދޭ ފަންޑިންގ ޕްރޮގްރާމެކެވެ.
އެލައިޑުން ބުނާ ގޮތުގައި މިޕްރޮގްރާމުގައި ޞިއްޙީ ދުޅަހެޔޮކަމާއި، އިޖުތިމާޢީ ޚިދުމަތް، ތިމާވެށި ރައްކާތެރިކުރުން، އަންހެނުންނާއި ކުޑަކުދިންގެ ހައްގުތައް، ތައުލީމާއި ތާރީޚުގެ ރޮނގުން ހެޔޮ ބަދަލުތަކެއް ގެނައުމަށް ހިންގިދާނެ ޕްރޮޖެކްޓްތައް ހުށަހަޅާލެވޭނެކަމަށެވެ.
އެލައިޑްގެ ކޮމިއުނިޓީ ފަންޑަށް ހުށަހެޅޭނީ ((communityfund@allied.mv މެދުވެރިކޮށެވެ.
ހުށަހަޅާ ޕްރޮޖެކްޓް ޕްރޮޕޯސަލްގެ ތެރެއިން އެންމެ ރަނގަޅު ޕްރޮޕޯސަލް ހުށަހަޅާ 4 ފަރާތަށް 50،000 ރުފިޔާގެ އެހީއެއް ދިނުމަށް ވަނީ ކަނޑައަޅާފައެވެ.