ފާއިތުވި ދެ ދުވަސް ތެރޭގައި އިންޑިއާގެ 77 ޑްރޯން ވައްޓާލާފައިވާ ކަަމަށް ޕާކިސްތާނުގެ އަސްކަރިޔާއިން ބުނެފިއެވެެ.
ޕާކިސްތާނުގެ ދައުލަތުގެ މީޑިއާއިން ރިޕޯޓުކޮށްފައިވާ ގޮތުގައި މިހާތަނަށް އެ ގައުމުން ވަނީ އިންޑިއާގެ 77 ޑްރޯން ވައްޓާލާފައެވެ.
މޭ 7 ވަނަ ދުވަހު އިސްވެ ޕާކިސްތާނަށް ޙަމަލާ ދީފައި ވަނީ އިންޑިޔާގެ އަސްކަރިއްޔާއިންނެވެ. އިންޑިޔާގެ ޙަމަލާތައް އަމާޒު ކޮށްފައި ވަނީ ނިރުބަވެރި ޖަމާޢަތްތަކުން ޕާކިސްތާނުގައި ހަރަކާތްތެރިވަމުންދާ ކަމަށް ބުނާ ސަރަޙައްދުތަކަށެވެ. އިންޑިޔާއިން ޕާކިސްތާނަށް ޙަމަލާ ދީފައި ވަނީ، ނިރުބަވެރި ޖަމާޢަތަކުން އިންޑިޔާގެ ކަޝްމީރުގައި ދިން ބަޑީގެ ޙަމަލާތަކަކާ ގުޅުވައެވެ.
ޕާކިސްތާނުގެ އެތައް ސަރަހައްދަކަށް ބުދަ ދުވަހުގެ ރޭ އިންޑިއާއިން ދިން ވައިގެ ހަމަލާތަކުގެ ސަބަބުން ދެ ގައުމުގެ މެދުގައި އޮތް ޢަދާވާތްތެރިކަން އިތުރުވަމުންދާއިރު، ޕާކިސްތާނުގެ ވައިގެ ސަރަހައްދަށް ވަދެފައިވާ އިންޑިއާގެ 29 ޑްރޯން ވައްޓާލާފައިވާ ކަމަށް ޕާކިސްތާނުގެ އަސްކަރިއްޔާއިން ވަނީ ބުނެފައެވެ.
މީގެއިތުރުން ޕާކިސްތާނުގެ ފޮރިން މިނިސްޓްރީން ބުނީ އިންޑިއާގެ ކޮންޓްރޯލްގެ ދަށުގައި އޮތް ކަޝްމީރުގެ ތިން ސަރަހައްދަކަށް ޕާކިސްތާނުގެ އަސްކަރިއްޔާ އިން ހަމަލާ ދެމުން ގެންދާ ކަމަށް ބުނެ އިންޑިއާގެ މީޑިއާތަކުން ދޮގު ހަބަރުތަކެއް ފަތުރަމުންދާ ކަމަށެވެ. އެއީ ޕާކިސްތާނު ބަދުނާމު ކުރުމަށް ރޭވިގެން ހިންގާ ޒިންމާދާރުކަން ކުޑަ އަމަލެއް ކަމަށެވެ.
އިންޑިޔާގެ އަސްކަރިއްޔާއިން ބުނީ، ދެބަސްވުން އުފެދިފައިވާ ކަޝްމީރުގެ ސަރަޙައްދީ ރޮނގު ކައިރީގައި ޙަމަލާ ބަދަލު ކުރުން މެދުކަނޑައިލުމާ ގުޅޭ ގޮތުން އަމަލު ކުރަމުންދާ އެއްބަސްވުމަށް ޕާކިސްތާނުން މެދުނުކެނޑި ޚިލާފުވަމުންދާ ކަމުގައެވެ. އަދި ކަޝްމީރުގެ ސަމްބާ ސަރަޙައްދަށް ޕާކިސްތާނުގެ ސިފައިން އެއްގަމު މަގުން އެރުމަށް މަސައްކަތް ކޮށްފައިވާ ކަމުގައި ވެސް އިންޑިޔާގެ ސަރަޙައްދީ ރޮނގު ބަލަހައްޓާ ސިފައިން ތުހުމަތު ކުރިއެވެ.
އިންޑިއާ އާއި ޕާކިސްތާނުގެ ގުޅުން އެހާބޮޑަށް ހީނަރުވެ، ހަނގުރާމައެއް ފެށުމުގެ ހާލަތަށް ގޮސްފައިވަނީ މިދިޔަ މަހުގެ ކަޝްމީރުގެ އިންޑިއާ ފަޅީގެ ޕަހަލްގަމްގައި ދިން ޓެރަރިސްޓް ހަމަލާތަކަކާއި ގުޅިގެން، އިންޑިއާ ބަޔަކު ހިމެނޭހެން 27 މީހަކު މަރުވި ހާދިސާގައެވެ. އެ ހަމަލާތަކުގެ ޒިންމާ އިންޑިއާ އިން ވަނީ ޕާކިސްތާނުގެ ބޮލުގައި އަޅުވާފައެވެ.
“އޮޕަރޭޝަން ސިންދޫރު” ގެ ނަމުގައި އިންޑިއާއިން ޕާކިސްތާނަށް ހަމަލާދޭން ފެށީ މިދިޔަ މަހު 22 ވަނަ ދުވަހު ކަޝްމީރުގެ އިންޑިއާ ފަޅީފައި ދިން ހަމަލާއެއްގައި އިންޑިއާގެ 25 މީހުންނާއި ނޭޕާލް އެކަކު މަރުވުމާ ގުޅިގެން ދެ ގައުމުގެ ގުޅުން ގޯސްވެފައިވާ ދަނޑިވަޅެއްގައެވެ.
ޙަމަލާ ބަދަލު ކުރުން ހުއްޓައިލުމަށް ގޮވައިލައްވާފައިވާ ބޭފުޅުންގެ ތެރޭގައި އެމެރިކާގެ ނައިބު ރައީސް ޖޭޑީ ވޭންސް ވެސް ހިމެނެއެވެ.