"ދިވެހިރާއްޖެ 2.0 ޑިޖިޓަލް ޓްރާންސްފޮމޭޝަން ސަމިޓް" އިފްތިތާޙުކުރެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ވިދާޅުވެވުނު ކުށެއް އިސްލާޙުކުރައްވައި، ރަނގަޅު ގޮތް އެމަނިކުފާނު ވިދާޅުވެދެއްވައިފި އެވެ.
ރޭގެ ރަސްމިއްޔާތުގައި ރައީސް ވާހަކަފުޅު ދައްކަވަމުން ވިދާޅުވެފައިވަނީ، 2028 ވަނަ އަހަރު ފެށޭއިރު، މުޅި ދައުލަތުގެ ޚިދުމަތުގައި މަސައްކަތްކުރާ ގާތްގަނޑަކަށް 49,000 މުވައްޒަފުންގެ ތެރެއިން ތިންބައިކުޅަ އެއްބައި މުވައްޒަފުން، ކަނޑައެޅޭ ވަކި އުސޫލެއްގެ ދަށުން ގޭގައި ތިބެގެން މަސައްކަތްކުރާ ގޮތަށް ބަދަލުކުރުމަކީ އެމަނިކުފާނުގެ އުންމީދެއް ކަމަށެވެ.
އެގޮތުން ވާހަކަފުޅު ދައްކަވަމުން ރައީސް ވިދާޅުވެފައިވަނީ ހަފްތާއަކު 30 ގަޑިއިރު، ނުވަތަ ކަނޑައެޅޭ ވަކި ވަގުތަކަށް، ވަގުތު ހަމަކުރުމަށް އޮފީހަށް އައުން އޭގެތެރޭގައި ހިމެނޭ ގޮތަށް ކަމަށެވެ. ނަމަވެސް އެއީ ކުށަކަށްވާތީ، އެކްސްގައި ކުރެއްވި ޕޯސްޓެއްގައި އެކަން އިސްލާޙުކުރައްވައި، އެމަނިކުފާނު ވިދާޅުވާން ގަސްދުކުރެއްވީ "މަހަކު 30 ގަޑިއިރު" ކަމަށް ވިދާޅުވެފައިވެ އެވެ.
"… ނަމަވެސް ދެންނެވުނީ ‘ހަފްތާއަކު 30 ގަޑިއިރު’. އެހެން ކަމުން، ވަރަށް މަޢާފާއެކު، އެކަމުގެ ރަނގަޅު ގޮތް ދަންނަވާލަން. ބާއްޖަވެރި ރެއަކަށް އެދެން،" މިހެން ރައީސް އެކްސްގައި ކުރެއްވި ޕޯސްޓްގައި ލިޔުއްވާފައިވެ އެވެ.
މި ބަދަލަކީ ޤާނޫނީ އުސޫލުގެ ތެރެއިން، ކަނޑައެޅިފައި އޮންނަ މިންގަނޑުތަކެއްގެ ތެރެއިން ގެންނާނެ ބަދަލެއް ކަމަށް ރައީސް ވަނީ ފާހަގަކުރައްވާފައެވެ.