ދައުލަތުގެ ޚިދުމަތްތައް ޑިޖިޓަލައިޒްކުރުމަށް ސަރުކާރުން ފަށާފައިވާ “ދިވެހިރާއްޖެ 2.0” ގެ ތެރޭގައި އިލެކްޓްރޯނިކް ވޯޓިން ތަޢާރަފުކުރުން ނުހިމެނޭކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ. އަދި މި ސިޔާސަތުގެ މައިގަނޑު މަޤްޞަދަކީ ކޮރަޕްޝަން ނައްތާލައި ދައުލަތުގެ ޚަރަދު ކުޑަކުރުން ކަމުގައިވެސް އެ މަނިކުފާނު ފާހަގަކުރެއްވިއެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު އިހުސާން ވިދާޅުވެފައިވަނީ، ރައީސުލްޖުމްހޫރިއްޔާއާއެކު އެސްޓޯނިއާއަށް ވަޑައިގެންނެވި ބޭފުޅެއްގެ ހައިސިއްޔަތުންނާއި “ދިވެހިރާއްޖެ 2.0” އާ ގުޅޭ ގޮތުން ބޭއްވި ސަމިޓުގެ ބައިވެރިއެއްގެ ހައިސިއްޔަތުން، އިދިކޮޅު ފަރާތްތަކުން ކުރަމުންދާ ތުހުމަތުތަކުގެ ޙަޤީޤަތް ހާމަކުރުމަށް ބޭނުންފުޅުވާ ކަމަށެވެ.
“އެސްޓޯނިއާ ދަތުރުފުޅުގައި އަދި ރޭ ބޭއްވި ޖަލްސާގައިވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަކުރާރުކޮށް ވިދާޅުވެފައިވަނީ އީ-ވޯޓިން ފިޔަވައި އެސްޓޯނިއާގައި ޤާއިމުކޮށް ފޯރުކޮށްދެމުންދާ ހުރިހާ ޑިޖިޓަލް ޚިދުމަތެއް ދިވެހިރާއްޖޭގައި ޤާއިމުކުރައްވަން ބޭނުންފުޅުވާ ކަމަށް،” އިހުސާން ވިދާޅުވިއެވެ.
މޯލްޑިވްސް 2.0 ގެ މައިގަނޑު މަޤްޞަދުތަކުގެ ތެރޭގައި ދައުލަތުން ފޯރުކޮށްދޭ ގިނަ ޚިދުމަތްތައް ޑިޖިޓަލައިޒްކުރުމާއި، ޑިޖިޓަލް ޚިދުމަތް ފޯރުކޮށްދިނުމަށް ބޭނުންކުރާ މަންސަތަކުގެ މެދުގައި މުވާޞަލާތުކުރެވޭނެ ގޮތް ޤާއިމުކޮށް، އެއްތަނުން ޚިދުމަތް ލިބޭނެ އިންތިޒާމު ހަމަޖެއްސުން ހިމެނެއެވެ.
މިއީ ދިވެހިރާއްޖޭގައި ޑިޖިޓަލް ޚިދުމަތްތައް ޤާއިމުކުރުމަށް މިހާތަނަށް ހިންގޭ އެންމެ ބޮޑު މަޝްރޫޢު ކަމަށްވާއިރު، މި މަޝްރޫޢު ނިމުމުން ދައުލަތުގެ މުހިންމު ހުރިހާ ޚިދުމަތެއް ޑިޖިޓަލް މަންސަތަކުން ލިބެން ހުންނާނެ ކަމަށް ސަރުކާރުން ބުނެއެވެ.