ސަރުކާރުގެ “މޯލްޑިވްސް 2.0” މަޝްރޫއަކީ ސިޔާސީ ކުރުމުގެ ބަދަލުގައި ގައުމީ ތަރައްގީއަށް ޓަކައި ހުރިހާ ފަރާތްތަކުން އެއްބާރުލުންދޭން ޖެހޭ މުހިންމު މަސައްކަތެއް ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
މި މަޝްރޫއާ ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ސައީދު ވިދާޅުވެފައިވަނީ، މި މަޝްރޫއުގެ ސަބަބުން މުޅި ގައުމަށް ކުރިއެރުން ލިބިގެންދާނެ ކަމަށެވެ. އަދި ދައުލަތާއި ސަރުކާރުގެ ހިންގުން ހަރުދަނާކޮށް، “ބިއުރޮކްރަސީ”ގެ ސަބަބުން ނިޒާމުގައި ހުރި އުނދަގޫތައް ނައްތާލުމަކީ ތަރައްގީއަށް ރާއްޖެ ކުރާ މަސައްކަތުގައި ކޮންމެހެން ވެސް ކުރަންޖެހޭ މަސައްކަތެއް ކަމަށް ފާހަގަކުރައްވާފައިވެއެވެ.
ވަޒީރު ސައީދު ވިދާޅުވި ގޮތުގައި، މި ދާއިރާގައި ދުނިޔޭގައި ނަމޫނާ ދައުރެއް އަދާކުރަމުންދާ އެސްޓޯނިއާގެ ތަޖުރިބާ ހޯއްދެވުމަށް ރައީސް ޑރ. މުހައްމަދު މުއިއްޒު ނިންމަވައި، “މޯލްޑިވްސް 2.0″ގެ ނަމުގައި ފައްޓަވާފައިވަނީ މުހިއްމު ގައުމީ މަސައްކަތްޕުޅެކެވެ.
“2040 ވަނަ އަހަރު އަންނަންވާއިރު ހުރިހާ މާނައެއްގައި ތަރައްގީވެފައިވާ ގައުމަކަށް ދިވެހިރާއްޖެ ހެއްދެވުމުގެ ވިޝަންގައި ރައީސުލްޖުމްހޫރިއްޔާ ފައްޓަވާފައިވާ މި މަސައްކަތަކީ ވަރަށް ވެސް ބޭނުންތެރި މަސައްކަތެއް،” ވަޒީރު ވިދާޅުވިއެވެ.
މި މަޝްރޫއުގެ ސަބަބުން ސަރުކާރުގެ ހިންގުމުގެ ނިޒާމު ހަރުދަނާވުމުގެ އިތުރުން ވިޔަފާރިއާއި އިންވެސްޓްމަންޓް އަދި ޖުމްލަކޮށް އިގްތިސާދަށް ގިނަ ފައިދާތަކެއް ކުރާނެ ކަމަށް ވަޒީރު ފާހަގަކުރައްވާފައިވެއެވެ. އަދި މިފަދަ ކަންކަން ސިޔާސީ ކުރުމުގެ ބަދަލުގައި ގައުމީ ތަރައްގީއަށް އެއްބާރުލުންދީ މަރުހަބާކިޔުމަކީ މުޅި ޤައުމަށް ލިބިގެންދާނޭ ކުރިއެރުމެއް ކަމަށްވެސް ވަޒީރު ސައީދު ވިދާޅުވެފައިވެއެވެ.