ރާއްޖޭގެ ކޮންމެ ކުޑަކުއްޖަކަށްވެސް އަމާން، ރައްކާތެރި އަދި އުފާވެރި ވެއްޓެއް ހޯދައިދިނުމަކީ އަޅުގަނޑުމެންގެ ޢަޒުމް ކަމުގައި ހަދަންޖެހޭ ކަމަށް ތަޢުލީމާބެހޭ ވަޒީރު، ޑރ. އިސްމާޢީލް ޝަފީޢު ވިދާޅުވެއްޖެއެވެ.
ކުޑަކުދިންގެ ދުވަހާ ގުޅުވައިގެން ދެއްވި ޚިޠާބުގައި ވަޒީރު ވިދާޅުވީ، ކޮންމެ ސްކޫލަކީވެސް ކިޔަވާ ކުދިންނަށް އަމާން، ރައްކާތެރި އަދި އުފާވެރި ތަނަކަށް ހެދުމަކީ މުހިންމު ކަމެއް ކަމަށެވެ. އަދި މިކަން ހާސިލުކުރެވޭނީ މުދައްރިސުންނާއި، ރަށްރަށުގެ ކައުންސިލަރުންނާއި، ބެލެނިވެރިންނާއި އަދި މިނިވަން މުއައްސަސާތައް ހިމެނޭހެން ދިވެހިރާއްޖޭގެ ހުރިހާ އެންމެން ގުޅިގެން ކުރާ މަސައްކަތުން ކަމަށް ވަޒީރު ފާހަގަކުރެއްވިއެވެ.
“އެންމެން ގުޅިގެން މިކަން ހެޔޮގޮތުގައި ކުރެވިއްޖެނަމަ، ކުޑަކުދިންނަށް އުފާވެރި މުސްތަޤުބަލެއް ހޯދައިދެވޭނެ” ކަމަށް ވަޒީރު ވިދާޅުވިއެވެ. އަދި މިކަމުގެ ސަބަބުން ޤައުމަށް ކުރިއެރުން ގެނެސްދޭނެ އޮއްޓަރުހުރި ޖީލެއް ބިނާކުރެވޭނެ ކަމަށްވެސް އެމަނިކުފާނު ފާހަގަކުރެއްވިއެވެ.
މި ދުވަހާ ގުޅުވައިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ޚިޠާބުގައި ވެސް ވަނީ ގޭތެރެއިންނާއި މަގުމަތީންނާއި އަދި މިނޫން ކޮންމެ ތަނަކުންވެސް އެކަކު އަނެކަކަށް އިޙްތިރާމްކުރާ، އަދަބު އަޚްލާޤުން ޒީނަތްތެރިވެފައިވާ ރީތި މާޙައުލެއް ކުޑަކުދިންނަށް ދެއްކުމަށް ޢަޒުމް ކަނޑައަޅަންޖެހޭ ކަމަށް ވިދާޅުވެފައެވެ.
އަދި ހަމައެއާއެކު، ހަރުދަނާ ޖީލެއްގެ ގޮތުގައި ކުޑަކުދިން ތަރުބިއްޔަތުކޮށް، ދިވެހީންގެ ސިޔާދަތާއި، ކަރާމާތާއި، ތަމައްދުން ނަގަހައްޓާނެ ބައެއްގެ ގޮތުގައި އެކުދިން ބޮޑެތިކުރުމަކީ އެންމެންގެ ކޮނޑުގައި އެޅިފައިވާ އެންމެ އިސް ޤައުމީ ވާޖިބު ކަމުގައި ރައީސް މުޢިއްޒު ފާހަގަކުރެއްވިއެވެ.