ކުޑަކުދިންނަށް އެންމެ މުހިންމީ، ބޮޑެތި މީހުންގެ ލޯތްބާއި އަޅައިލުމާއި، ރަނގަޅު މަގު ދެއްކުންކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ. މިއަދު ފާހަގަކުރާ ކުޑަކުދިންގެ ދުވަހާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި އެކަމަނާ ވަނީ މިފަދައިން ވިދާޅުވެފައެވެ.
ފަސްޓް ލޭޑީ ސާޖިދާ މުޙައްމަދު ވިދާޅުވި ގޮތުގައި ދިވެހި ކޮންމެ ކުޑަކުއްޖަކަށް އުޖާލާ މާދަމާއެއް ހޯދައިދިނުމަކީ މުޅި މުޖްތަމަޢުގެ ޒިންމާއެކެވެ. އަދި މިކަމަށްޓަކައި މުޖުތަމަޢުގެ ހުރިހާ ފަރާތްތަކުން މަސައްކަތްކުރުމުގެ މުހިންމުކަން އެކަމަނާ ވަނީ ފާހަގަކުރައްވާފައެވެ.
މީގެ އިތުރުން، ރާއްޖޭގައި ފުރަތަމަ ފަހަރަށް ބޭއްވުނު “ނޭޝަނަލް ޖުވެނައިލް ޖަސްޓިސް ކޮންފަރެންސް” ގައި ވާހަކަފުޅު ދައްކަވަމުން، ޤާނޫނާއި ގަވާއިދުތަކާ ޚިލާފުވާ ކުޑަކުދިންނަށް ކޯޓު ރޫމްތަކުން ބައްދަލުވުމުގެ ކުރިން އެހީތެރިކަން ފޯރުކޮށްދިނުމަށް އަވަސްވެގަންނަން ޖެހޭކަމަށް އެކަމަނާ ވަނީ އިލްތިމާސް ކުރައްވާފައެވެ.
ކުޑަކުދިންގެ ޙައްޤުތައް ރައްކާތެރިކޮށް ކަށަވަރުކުރުމަށްޓަކައި ފަސްޓް ލޭޑީ ވަނީ ގުޅުންހުރި އިދާރާތަކާއި ޖަމިއްޔާ ޖަމާއަތްތަކާއެކު ގިނަ މަޝްވަރާ ބައްދަލުވުންތަކެއް ބާއްވަވާފައެވެ. އަދި ޔުނިސެފް ފަދަ ބައިނަލްއަޤްވާމީ ޖަމްޢިއްޔާތަކާއެކު ކުޑަކުދިންގެ ޙައްޤުތައް ހިމާޔަތްކުރުމަށް އެކަމަނާ ގެންދަވަނީ މުހިންމު މަސައްކަތްތަކެއް ކުރައްވަމުންނެވެ.
ފަސްޓް ލޭޑީގެ މި މަސައްކަތްތަކަކީ ކުޑަކުދިންގެ ޙައްޤުތައް ރައްކާތެރިކުރުމަށާއި، އެކުދިންނަށް އުޖާލާ މުސްތަޤުބަލެއް ބިނާކޮށްދިނުމަށް ކުރެވޭ މުހިންމު މަސައްކަތްތަކެއްގެ ގޮތުގައި ފާހަގަކުރެވެއެވެ.