ސަރުކާރުން އާސަންދައިގެ ދަށުން ހެލްތު ޗެކްއަޕް ހަދައިދޭން ފެށިފަހުން 4.6 މިލިއަން ރުފިޔާގެ ޗެކްއަޕް ހަދާފައިވާކަން އާސަންދައިން ހާމަކޮށްފިއެވެ. މި މަޢުލޫމާތު ހާމަ ކޮށްފައި ވަނީ އެމްއެމްޓީވީން އެދިގެން އާސަންދައިން ހިއްސާ ކޮށްފައިވާ ތަފްސީލު ތަކުގައެވެ.
އާސަންދައިން ދީފައިވާ މަޢުލޫމާތުގައިވާ ގޮތުން، މި ޚިދުމަތުގެ ދަށުން އެކި އުމުރުފުރާތަކަށް އަމާޒުކޮށްގެން ތަފާތު ޕެކޭޖުތައް ތަޢާރަފުކޮށްފައިވެއެވެ. މީގެ ތެރޭގައި 18 އަހަރުން ދަށުގެ ކުދިންނަށް ޚާއްޞަ ސްކޫލް ހެލްތު ސްކްރީނިންގ ޕެކޭޖު، 40 އަހަރުން މަތީގެ މީހުންނަށް ޚާއްޞަ ކެންސަރު ޕެކޭޖު، އަދި 40 އަހަރުން މަތީގެ ފިރިހެނުންނާއި އަންހެނުންނަށް ވަކިވަކިން ޚާއްޞަކޮށްފައިވާ މެޑިކަލް ޗެކްއަޕް ޕެކޭޖުތައް ހިމެނެއެވެ.
ތަފްސީލުތަކަށް ބަލާއިރު، ސްކޫލް ހެލްތު ސްކްރީނިންގ ޕެކޭޖުގެ ދަށުން 123 ދަރިވަރަކު ޗެކްއަޕް ހަދާފައިވާއިރު، މިއަށް 127,305 ރުފިޔާ ޚަރަދުވެފައިވެއެވެ. ކެންސަރު ޕެކޭޖުގެ ދަށުން 699 މީހަކު ސްކްރީނިންގ ހަދާފައިވާއިރު، މިއަށް 619,740 ރުފިޔާ ޚަރަދުވެފައިވެއެވެ. 40 އަހަރުން މަތީގެ މީހުންގެ މެޑިކަލް ޗެކްއަޕް ޕެކޭޖުގެ ދަށުން 2,824 މީހަކު ޗެކްއަޕް ހަދާފައިވާއިރު، މިއަށް 3,547,650 ރުފިޔާ ޚަރަދުވެފައިވެއެވެ.
މީގެ އިތުރުން، 19 އަހަރާއި 39 އަހަރާ ދެމެދުގެ 642 މީހަކު މެޑިކަލް ޗެކްއަޕް ހަދާފައިވާއިރު، މިއަށް 268,020 ރުފިޔާ ޚަރަދުވެފައިވެއެވެ. އަދި ޖެނެރަލް އޯޕީޑީ ޑޮކްޓަރުން ބުނެގެން 642 މީހަކު 748 މެޑިކަލް ޗެކްއަޕް ހަދާފައިވާއިރު، މިއަށް 74,800 ރުފިޔާ ޚަރަދުވެފައިވެއެވެ.
ޖުމްލަކޮށް ބަލާއިރު، އާސަންދައިގެ ދަށުން 3,446 މީހަކު 4,805 ފަހަރު މެޑިކަލް ޗެކްއަޕް ހަދާފައިވާއިރު، މިއަށް ޖުމްލަ 4,637,515 ރުފިޔާ ޚަރަދުވެފައިވާކަން އާސަންދައިން ހާމަކޮށްފައިވެއެވެ.
އާސަންދަ މެދުވެރިކޮށް އަހަރަކު ދެފަހަރު މެޑިކަލް ޗެކްއަޕް ހެދުމުގެ ޚިދުމަތް ފެށިފައިވަނީ 2024 ވަނަ އަހަރުގެ ޖަނަވަރީ މަހުއެވެ. އާސަންދައިގެ ދަށުން މެޑިކަލް ޗެކްއަޕް ހެދޭނެ ގޮތް ފަހިކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.