“މޯލްޑިވްސް 2.0″ގެ މަޤްސަދަކީ ރާއްޖޭގައި ދެފުށް ފެންނަ ހާމަކަންބޮޑު ހިންގުމުގެ ނިޒާމެއް ޤާއިމުކުރުން ކަމަށާއި އެއީ އެއްވެސް މާނައެއްގައި އީ-ވޯޓިންގ ގެނައުމަށް ކުރެވޭ މަސައްކަތެއް ނޫންކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރު މިފަދައިން ވިދާޅުވީ ރޭ ރާއްޖެ ޤައުމީ ފެންވަރުގައި ޑިޖިޓަލައިޒްކުރުމަށް ސަރުކާރުން ކުރިއަށްގެންދާ މަސައްކަތުގެ ދަށުން ކުރިއަށްދާ “މޯލްޑިވްސް 2.0” ސަމިޓު ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ވަޒީރު އިހްސާނު ވަނީ މޯލްޑިވްސް 2.0 އާއި ގުޅޭގޮތުން އިދިކޮޅު ފަރާތްތަކުން ދައްކަމުންދާ ވާހަކަތަކަށް ރައްދުދެއްވާފައެވެ.
އިދިކޮޅު ފަރާތްތަކުން ފާޅުކުރަމުންދާ ކަންބޮޑުވުންތަކަށް ޖަވާބު ދެއްވަމުން، ވަޒީރު އިޙްސާން ވަނީ “މޯލްޑިވްސް 2.0” އަކީ އީ-ވޯޓިންގ ނިޒާމެއް ތަޢާރަފުކުރުމަށް ކުރެވޭ މަސައްކަތެއް ނޫންކަން ސާފުކޮށް ވިދާޅުވެފައެވެ.
“މޯލްޑިވްސް 2.0 ގެ އެއްވެސް މަޤްސަދެއްގައި އަދި ފޮރުވިފައިވެސް އަދި ހާމަކަމާއެކުގައިވެސް އީ-ވޯޓިންގގެ އެއްވެސް ވާހަކައެއް ދެކެވިފައެއް ނޯންނާނެ” ވަޒީރު އިޙްސާން ވިދާޅުވިއެވެ.
“މޯލްޑިވްސް 2.0″ގައި ސަރުކާރުން ޤާއިމުކުރާނީ ހާމަކަން ބޮޑު ނިޒާމެއްކަމަށާއި، މި ނިޒާމުގެ ދަށުން އެއްވެސް ފަރުދެއް އަދި ރަށެއް ބާކީނުކޮށް، ޚިދުމަތްދެވޭ ސިސްޓަމްތަކެއް ޤާއިމުކުރެވޭނެކަމަށާއި، ދައުލަތުގެ ހުރިހާ އިދާރާއެއް އެއް ވިއުގައަކުން ގުޅިފައިވާ އަދި ތަކުރާރުކޮށް އެއްމަޢުލޫމާތުތަކެއް އިދާރާތަކަށް ހުށައަޅަން ނުޖެހޭނެ ފަދަ ނިޒާމަކަށް މިނިޒާމުވެގެންދާނެކަމަށް ވަޒީރު އިޙްސާން ވިދާޅުވިއެވެ.
މި މަޝްރޫޢުގެ މައިގަނޑު މަޤްސަދަކީ ދައުލަތުގެ ޚިދުމަތްތައް ފަސޭހަކަމާއެކު ރައްޔިތުންނަށް ފޯރުކޮށްދިނުމާއި، ދައުލަތުގެ ހިންގުމުގެ ނިޒާމު އިތުރަށް ހަރުދަނާކުރުން ކަމަށް ވަޒީރު އިޙްސާން ވަނީ ވިދާޅުވެފައެވެ.